Kesi ya Lema yazidi kupgwa kalenda

KESI inayomkabili  Mbunge wa Arusha Mjini, Godbless Lema (Chadema) ya madai uchochezi  dhidi ya Rais John Magufuli, imezidi kupigwa kalenda.

Hatua hiyo ilijitokeza tena jana  baada ya Hakimu  Mkazi   Mfawidhi wa Mahakama ya  Wilaya ya Arumeru, Desderi Kamugisha,  anayesikiliza kesi  hiyo kutokuwapo mahakamani hapo. 

Akiahirisha  kesi hiyo jana mbele ya Wakili wa Serikali Alice Mtenga, Hakimu Mkazi  Patricia Kisinda alisema kesi hiyo  haiwezi kuendelea sababu hakimu anayesikiliza kesi hiyo hayupo.

“Kesi hii ilikuja leo  kwa ajili ya usikikilizwaji  lakini haiwezi  kusikilizwa kwa sababu hakimu wenu anayesikiliza hayupo, hivyo naipanga  Januari 18, mwakani,” alisema.

Oktoba 9, mwaka huu, Wakili Sheck Mfinanga, alijitoa kuendelea  kumtetea mteja wake kwa kile alichodai kuomba mwenendo wa kesi zaidi  ya mara tatu mahakamani hapo na kushindwa kupewa ili kukata rufani  Mahakama Kuu, lakini Hakimu  Kamugisha amegoma kutoa.

 Awali, wakili Mfinanga alimwomba Hakimu  Kamugisha kujitoa kusikiliza  kesi ya hiyo licha ya mbunge huyo  kumtaka afanye hivyo kwa kile alichodai kuwa aliwahi kufanya uamuzi wa  hila  uliosababisha kukaa mahabusu kwa zaidi ya miezi minne.

Hata hivyo, hakimu huyo aliamua kuendelea na shauri hilo, hata pale   mawakili wa Lema walipowasilisha kwa mdomo kusudio la kukata rufani   Mahakama Kuu kwa lengo la kupinga uamuzi huo wa kuendelea kusikiliza kesi hiyo.

Hata hivyo, Wakili wa Serikali,  Khalili Nuda, aliiomba mahakama itupilie mbali hoja hizo kwa kuwa  anaamini hakimu alitoa uamuzi kwa kuzingatia sheria, huku akidai kuwa  mawakili wa Lema wana nia ya kuchelewesha usikilizwaji wa kesi.

akitolea uamuzi mdogo hoja hizo, kamugisha alisema hazina mashiko hivyo kuzitupa, kwa kile alichoeleza kuwa jaji au hakimu hawezi   kujitoa kwa sababu za kudhaniwa, kufikirika au zinazotokana na uoga.