TFF WAKATAA MABADILIKO YANGA,WATAKA SABABU YA KUKODISHWA KWA MIAKA 10..!!!

SHIRIKISHO la Soka Tanzania (TFF) limesema halitambui mabadiliko ya uendeshwaji wa Klabu ya Yanga na wameuandikia uongozi wa Yanga barua wakitaka nakala ya mkataba wa ukodishwaji wa klabu hiyo kwa miaka kumi kwa mwekezaji anayetambulishwa kama Yanga Yetu.

Akizungumza na waandishi wa habari katika ofisi za Shirikisho hilo Karume, Dar es Salaam jana Katibu Mkuu wa TFF, Selestine Mwesigwa alisema, TFF imekuwa ikipokea barua kutoka kwa wadau mbalimbali wa Yanga wakihoji taratibu au hatua zinazoendelea katika mfumo wa umiliki na uendeshwaji wa timu hiyo.

Kauli hiyo ya TFF imekuja siku chache baada ya kutolewa taarifa na uongozi wa Yanga kwamba Bodi ya Wadhamini ya klabu hiyo imeridhia kuikodisha kwa Kampuni ya Yanga Yetu kwa miaka kumi.

Uamuzi wa kukodisha klabu hiyo ulifikiwa na wanachama wa Yanga katika mkutano wa dharura ulioitishwa na Mwenyekiti wake Yusuf Manji Agosti mwaka huu, ambapo alisema ataikodisha nembo na klabu kisha baada ya miaka kumi atairudisha.

Alhamisi iliyopita vyombo mbalimbali vya habari vilikuwa na taarifa kuhusu muhtasari wa mkataba wa Yanga kukodishwa na Kampuni ya Yanga Yetu Limited.

“Simba na Yanga wamekuja na mabadiliko ya kutaka kubadili mfumo wa uendeshaji na tukaziandikia barua kutaka kukutana nazo kutaka kujua uhalisia na Simba walikubali, lakini Yanga Kaimu Katibu Mkuu wao (Deusdedit Baraka) alitujibu tuwasiliane na wajumbe wa Baraza la Udhamini ndiyo wenye majibu juu ya mchakato wa ukodishwaji,” alisema Mwesigwa.

DOWNLOAD APP YETU YA SWAHIBA NEWS ILI UWEZE KUPATA HABARI ZOTE MOJA KWA MOJA KUPITIA SIMU YAKO YA MKONONI BILA KUINGIA KWENYE WEBSITE,KUDOWNLOAD BONYEZA HAPA  

ANDIKA MAONI YAKO HAPO CHINI