PLUIJM KUONGOZA YANGA LEO IKICHEZA NA MBAO FC..!!!

KOCHA Mholanzi Hans van der Pluijm, leo ataiongoza Yanga kuivaa Mbao FC baada ya juzi kukubali kurejea kuinoa timu hiyo.

Hatua hiyo inafuatia baada ya uongozi wa Yanga kumjibu barua yake ya kuachia ngazi, ikimkatalia na kumtaka kuendelea na kazi kwa kuwa ana mkataba wa miaka miwili.

Akizungumza na mwandishi wetu juzi, Pluijm alisema: "Ndiyo, nimerudi kazini na kesho nitaendelea na majukumu yangu kwa roho safi kama kocha mkuu".

Katika barua iliyosainiwa na Katibu wa Yanga, Baraka Deusdedit, Yanga ilisema haioni sababu ya kuachana na Mholanzi huyo baada ya mafanikio aliyoipa klabu. 

Mholanzi huyo alijiuzulu mapema wiki hii baada ya kukerwa na uongozi wa klabu kuleta kocha mpya, Mzambia George Lwandamina bila kumtaarifu, akisema huko ni kumvunjia heshima.

Kocha huyo alikataa hata nafasi ya ukurugenzi wa ufundi ambayo inasemekana Yanga ilitaka kumpa baada ya kumleta Lwandamina kuwa kocha mkuu.

Lakini baada ya kuwaaga wachezaji siku moja kabla ya mchezo wa Ligi Kuu Tanzania Bara dhidi ya JKT Ruvu timu ikishinda 4-0, Waziri wa Mambo ya Ndani, Mwigulu Nchemba aliingilia kati suala hilo.

Waziri Mwigulu ambaye inadaiwa ni shabiki wa Yanga, kwanza aliushauri uongozi kumrudisha Pluijm na baadaye akaenda kuzungumza na kocha huyo pia kumshauri akubali kurejea.

Baadaye akazikutanisha pande zote mbili, Pluijm na uongozi wa Yanga katika kikao ambacho inaelezwa makubaliano yalifikiwa na kisha uongozi wa Yanga kumuandikia barua Pluijm kumuomba arudi kazini. 

DOWNLOAD APP YETU YA SWAHIBA NEWS ILI UWEZE KUPATA HABARI ZOTE MOJA KWA MOJA KUPITIA SIMU YAKO YA MKONONI BILA KUINGIA KWENYE WEBSITE,KUDOWNLOAD BONYEZA HAPA  

ANDIKA MAONI YAKO HAPO CHINI