AMUUA MKEWE KWA KISU WAKIWA KITANDANI..!!!

NI unyama! Mwanaume aitwaye Sadiki Andrew, 31, anatafutwa kwa udi na uvumba na Jeshi Polisi mkoani Tanga kwa tuhuma za kumuua kwa kumchoma kisu shingoni mkewe Tabu Siasoni, 28.

Kamanda wa Polisi Mkoa wa Tanga, Benedict Wakulyamba, aliiambia Nipashe kuwa tukio hilo lilitokea Alhamisi usiku katika kijiji cha Ngarani B, Kata ya Kwakifua wilayani Muheza mkoani humo.

Akisimulia zaidi tukio hilo, Kamanda Wakulyamba alisema kuwa kabla ya kufanya unyama huo na kisha, kukimbilia kusikojulikana, mtuhumiwa alimsubiri mkewe Tabu apande kitandani, alale na kisha ndipo alipomkatishia uhai wake kwa kumchoma kisu shingoni. 

“Alimchoma kisu wakati akiwa amelala… baada ya kufanya mauaji hayo mtuhumiwa alikimbilia kusikojulikana. Hadi sasa bado anatafutwa,” alisema Kamanda Wakulyamba.

Aidha, Kamanda huyo alisema kuwa uchunguzi kuhusiana na tukio hilo unaendelea, huku taarifa za awali zikidai kuwa chanzo cha mwanume huyo kufikia uamuzi wa kinyama wa kumuua mkewe ni wivu wa kimapenzi. Hata hivyo, Kamanda hakufafanua zaidi juu ya suala hilo kwa maelezo kuwa bado uchunguzi wake unaendelea.

DOWNLOAD APP YETU YA SWAHIBA NEWS ILI UWEZE KUPATA HABARI ZOTE MOJA KWA MOJA KUPITIA SIMU YAKO YA MKONONI BILA KUINGIA KWENYE WEBSITE,KUDOWNLOAD BONYEZA HAPA  

ANDIKA MAONI YAKO HAPO CHINI