DK TULIA AWAGEUKIA WASIOONA ,ATAKA HUDUMA ZA AFYA BURE KWA WATU KUNDI HILO...!!!

Naibu Spika wa Bunge, Dk Tulia Ackson ameziagiza halmashauri nchini kuhakikisha zinaboresha  miundombinu kwa wasioona, ikiwamo kusimamia upatikanaji huduma za afya bure kama Serikali ilivyoelekeza.

Pia, ameishauri  Serikali kupitia upya sheria na sera za upatikanaji huduma muhimu kwa  watu wenye ulemavu hususan matibabu na ajira serikalini na taasisi binafsi.

Dk Tulia amesema hayo wakati wa maadhimisho ya kitaifa ya fimbo nyeupe kwa watu wasioona yaliyofanyika viwanja vya Ruanda Nzovwe jijini Mbeya na kuhudhuriwa viongozi mbalimbali.

 

Amesema kuelekea Tanzania ya viwanda, Serikali imeelekeza nguvu katika kutoa ajira kwa walemavu ili kuwajengea mazingira mazuri ya kuishi na kuanzisha shughuli za ujasiriamali, zitakazosaidia kujikwamua na umaskini ili kuondokana na utegemezi.

 

“Viongozi mmesikia wenzetu wanalalamikia huduma za afya, sasa ni wakati wa kuhakikisha mnawasimamia vyema katika upatikanaji wa huduma za afya, elimu bure na kusikiliza changamoto zinazowakabili,” amesema.

Mkuu wa Mkoa wa Mbeya, Amos Makalla amesema mkoa una  walemavu wasioona 603, kati yao 223 ni wanaume na 380 wanawake na Serikali imeboresha upatikanaji wa huduma za afya bure.

DOWNLOAD APP YETU YA SWAHIBA NEWS ILI UWEZE KUPATA HABARI ZOTE MOJA KWA MOJA KUPITIA SIMU YAKO YA MKONONI BILA KUINGIA KWENYE WEBSITE,KUDOWNLOAD BONYEZA HAPA  

ANDIKA MAONI YAKO HAPO CHINI