KUWAIT WAIPA MSAADA ZNZ..!!!

Katika kukabiliana na maradhi ya kipindupindu yaliyodumu kwa zaidi ya miezi saba na kusababisha vifo vya watu 57 huko visiwani Zanzibar, Nchi wahisani zinaendelea kutoa misaada ya madawa pamoja na ya kibinadamu, kwa lengo la kuiunga mkono Serikali ya Mapinduzi ya Zanzibar katika kukabiliana na maradhi hayo.

Balozi wa Kuwait hapa nchini, Bwana Jasem Al Najem ametembelea kambi ya wagonjwa wa kipindupindu iliyopo katika eneo la Chumbuni na kupatiwa maelezo na Daktari dhamana wa kanda ya Unguja Dk Fadhil Mohamed ambaye amemuwakilisha Waziri wa Afya Mahmoud Thabit Kombo.

Balozi Jasem amesema mbali na msaada huo wa awali, ameitaka mamlaka inayohusika kuwapatia orodha ya mahitaji muhimu ikiwemo madawa, vifaa vya matibabu pamoja na maji vitakavyotolewa mara moja ili kuongeza nguvu za kukabiliana na maradhi hayo yanayokatisha uhai wa maisha ya wananchi wa visiwa vya Unguja na Pemba.

Kwa upande wake, Dk.Fadhil Mohamed amesema hatua mbalimbali zimechukuliwa na Serikali ya Mapinduzi ya Zanzibar kwa lengo la kukabiliana na maradhi hayo, ikiwemo kupiga marufuku uuzwaji wa vyakula katika migahawa pamoja na kutoa elimu kwa umma namna ya kujikinga na mardhi hayo na matumizi bora ya maji safi na salama.