MIUNDOMBINU YAIPA DILI LA MAFUTA TANZANIA..!!!

WAZIRI wa Nishati na Madini, Profesa Sospeter Muhongo amewasili nchini kutoka Kampala, Uganda na kusema miundombinu ya Tanzania na usalama wake ni moja ya mambo yaliyowezesha Tanzania kupata dili la ujenzi wa bomba la mafuta kutoka Hoima, Uganda hadi bandari ya Tanga.

Akizungumza na waandishi wa habari mara tu baada ya kuwasili jana jioni alisema kwamba maunganiko ya reli ya Tanga hadi reli ya Kati na uwapo wa barabara kumeipatia Tanzania nafasi ya ujenzi wa bomba hilo kwani kaskazini mwa Kenya miundombinu hiyo haipo.

Akizungumza huku akimfagilia Rais John Magufuli kwa kazi yake nzuri ya kusimamia ujenzi wa barabara wakati alipokuwa Waziri wa Ujenzi, alisema kama kungelikosekana miundombinu hiyo kungeliikosesha Tanzania mradi huo muhimu Afrika Mashariki.

Tanzania ilikuwa inashindana na Kenya katika kupata nafasi ya kutekeleza mradi huo wenye kilomita 1,403 utakaobeba mafuta ghafi kutoka Hoima nchini Uganda hadi Tanga. Mradi huo wa dola za Marekani bilioni 4 sawa na Sh trilioni 8.7 ni ushindi mkubwa kwa Watanzania ambao walipeleka Uganda timu ya wataalamu kuwezesha ushawishi wa kwa nini Bomba hilo la mafuta linafaa kupitia Tanzania.

Kwa mujibu wa Waziri Muhongo mradi huo utakamilika Juni 2020 na kwamba mkutano wa Mawaziri wa Tanzania na Uganda wa Nishati na Madini na wataalamu wao kuhusiana na mpango wa utekelezaji utafanyika Ijumaa ijayo mjini hapa.

DOWNLOAD APP YETU YA SWAHIBA NEWS ILI UWEZE KUPATA HABARI ZOTE MOJA KWA MOJA KUPITIA SIMU YAKO YA MKONONI BILA KUINGIA KWENYE WEBSITE,KUDOWNLOAD BONYEZA HAPA