HIVI NDIVYO KIWANGO CHA UTOAJI MIMBA KINAVYOKUWA KWA KASI NCHINI..!!

Tatizo la utoaji mimba limebainika kuwa ni kubwa hapa nchini ambapo kwa mwaka 2013 imekadiriwa kuwa mimba 405,000 zilitolewa kwa wastani wa kiwango cha mimba 36 kwa kila wanawake 1000 wenye umri kati ya miaka 15-49 na uwiano wa utoaji mimba 21 kwa kila watoto 100 wanaozaliwa wakiwa hai.

Kiwango hiki kimetajwa kuwa sawa na wastani wa kiwango cha kanda ya Afrika mashariki kwa ujumla na juu kidogo ukilinganisha na kiwango cha nchi za Kusini mwa sahara.

Akizungumza wakati wa uzinduzi wa ripoti ya utoaji mimba kitaifa na huduma baada ya kuharibika mtafiti kutoka chuo kikuu cha afya na sayansi shirikishi Muhimbili Projestine Muganyizi amesema sheria za utoaji mimba na mila na desturi zilizopo zina utata katika suala hili ambapo sheria ya makosa ya jinai huidhinisha utoaji mimba ili kuokoa maisha ya mwanamke lakini haijaweka bayana kama utaratibu huu utalinda afya ya mwili na akili ya mwanamke huku hofu ya kushtakiwa kwa wananwake na watoa huduma ya afya pia ikisababisha wanawake kutoa mimba kwa siri kwa njia ambazo mara nyingi si salama na kuchangia katika vifo vya wajawazito.

Bw. Muganyizi amesema utafiti huo umefanyika katika mikoa ya Tanzania bara na viziwani ambapo mikoa ya kanda ya ziwa imeonyesha kuwa na kiwango cha juu kwa asilimia 51 ikifuatiwa ni mikoa ya nyanda za juu kusini asilimia 47, magharibi 44 huku zanzibar ikiwa na asilimia 11 ambayo ni ndogo kuliko maeneo yote.