HALMASHAURI KIBAHA YAPUUZA AGIZO HILI LA LUKUVI..!!

WAKAZI wa Machinjioni wilayani Kibaha mkoani Pwani, wameiomba Halmashauri ya Mji wa Kibaha, kutekeleza agizo la Waziri wa Ardhi, Nyumba na Maendeleo ya Makazi, William Lukuvi la kumaliza mgogoro wa ardhi kwenye eneo lao. Walisema eneo lao hilo lina mgogoro tangu mwaka 2010.

Akizungumza na waandishi wa habari mjini Kibaha, moja ya wananchi wa eneo Hilo, Said Tekelo alisema kuwa suala la mgogoro walilikabidhi kwa Lukuvi, ambaye aliipa Halmashauri ya Mji Kibaha miezi miwili kumaliza mgogoro huo ili haki zao zipatikane.

Tekelo alisema kuwa katika mgogoro huo, wananchi hawatakiwi kuendeleza maeneo yao tangu mwaka jana. Alisema hadi sasa hawajui hatma ya maeneo yao. “Sisi tunachotaka ni kulipwa na kuonyeshwa maeneo mengine kwa ajili ya kuishi, kwani tayari wananchi 41 walivunjiwa nyumba zao mwaka 2012 na baada ya hapo hakuna kilichofanyika.

Wametusimamisha kupata maendeleo kwa muda wote huo hakuna aliyelipwa chochote,” alisema Tekelo. Alisema kuwa wanashangazwa kuona Halmashauri imepima maeneo hayo na kuweka alama za mpaka kwenye maeneo yao, bila kusema chochote kwenye eneo hilo, ambalo lina wananchi 360 na lina ukubwa wa zaidi ya hekari 60.

“Tunamwomba Waziri Lukuvi atusaidie kwani tunaona agizo lake halijafanyiwa kazi na muda aliopanga wa miezi miwili, tunaona hakuna kinachoendelea, kwani halmashauri bado hawajatekeleza agizo lake la kuutatua mgogoro huu,” alisema Tekelo