BAADA YA MAFANIKIO YA KWENYE LIGI,SIMBA SC WAANZA KUMNANGA DYLAN KERR

Klabu ya Simba imesema kuwa Kocha Mkuu aliyepita Dylan Kerr aliwadekeza wachezaji wa timu hiyo kiasi cha kushindwa kufanya majukumu yake ipasavyo.

Akizungumza jijini Dar es Salaam, Afisa Habari wa klabu hiyo Haji Manara alisema kuwa kocha huyo alikuwa akipangiwa hata kikosi na wachezaji wenyewe.

 

Manara alisema hayo kufuatia baadhi ya wadau wa soka kuanza kuhoji jinsi kocha wa sasa Jackson Mayanja alivyokuwa mkali.

 

Kocha huyo aliwasimamisha wachezaji wawili wa timu hiyo Hassan Isihaka ambaye tayari ameshamaliza adhabu yake na Abdi Banda kutokana na kile kilichoelezwa kuwa ni utovu wa nidhamu.

 

"Kocha alikuwa akipangiwa kikosi na wachezaji wenyewe, na siku akipanga mwenyewe mmoja akikunja sura kuonekana kuwa amekasirika basi anampanga hata kama hayuko fiti," alisema Manara.

 

Mbali na hayo, Afisa Habari huyo alisema chini ya Kerr, wachezaji walikuwa akigomea mazoezi na kocha hakuwa na uwezo wa kuwaambia lolote.

 

"Siku moja nilikuwa na timu kocha alinifuata na kuniambia wachezaji wamegomea mazoezi kwa sababu mishahara imechelewa. Mimi niliwafuata na kuwaambia kuwa pesa zao watapata zimechelewa kwa sababu wadhamini wamechelewesha kwa sababu za kiofisi tu, nikawaambia kama mtu hataki mazoezi kwa sababu hii basi achukue begi lake aondoke. Walirejea mazoezini," alisema afisa huyo. 

 

Alisema kwa sasa Simba imempata kocha ambaye anajua majukumu yake na ndiyo maana unaona haya yote yanatokea.

"Nidhamu imekuwa juu ndani na nje ya uwanja, Simba sasa inacheza dakika zote 90, inaweza kufunga goli dakika yoyote," alisema.