GUNDU LA KUKATALIWA LAZIDI KUMWANDAMA PROF LIPUMBA,MADIWANI CUF DSM WAMCHUNIA..!!!

Uamuzi uliotolewa na Ukawa wa kutoshirikiana na Profesa Ibrahim Lipumba hautaathiri umoja huo wa vyama vya upinzani katika uchaguzi wa umeya wa manispaa za Dar es Salaam, baada ya madiwani wa CUF kumsusa.

Profesa Lipumba anatambuliwa na Msajili wa Vyama vya Siasa, Jaji Francis Mutungi kwamba ndiye mwenyekiti halali wa CUF, hata pale mkutano mkuu uliporidhia kujiuzulu kwake na kufuatiwa na uamuzi wa Baraza Kuu la Uongozi kumfukuza uanachama.

Mgogoro huo wa CUF uliokigawa chama hicho makundi mawili, uliwasukuma viongozi wa Ukawa wakiongozwa na Freeman Mbowe kutoa tamko la kumtenga Profesa Lipumba kwa madai kwamba analazimisha uenyekiti wa chama.

Licha ya Profesa Lipumba kudai anaungwa mkono na wanachama wengi wa CUF, madiwani wote wa chama hicho katika manispaa za Dar es Salaam wametangaza kuiunga mkono Ukawa kwenye uchaguzi wa meya katika manispaa zote.

Uchaguzi wa meya unafanyika baada ya kuanzishwa kwa wilaya mpya za Ubungo na Kigamboni. Ubungo imemegwa kutoka Wilaya ya Kinondoni na Kigamboni imemegwa kutoka Wilaya ya Temeke.

Tayari manispaa za Ubungo na Kinondoni zimegawana kata na kila moja itakuwa na meya na uchaguzi unatarajiwa kufanyika wiki ijayo. Manispaa za Temeke na Kigamboni bado hazijafikia mchakato wa kugawana kata na madiwani.

Madiwani kadhaa wa CUF waliozungumza na mwandishi wa habari hizi, kwa nyakati tofauti walisema hawamuungi mkono Profesa Lipumba anayepinga Ukawa.

DOWNLOAD APP YETU YA SWAHIBA NEWS ILI UWEZE KUPATA HABARI ZOTE MOJA KWA MOJA KUPITIA SIMU YAKO YA MKONONI BILA KUINGIA KWENYE WEBSITE,KUDOWNLOAD BONYEZA HAPA  

ANDIKA MAONI YAKO HAPO CHINI