KIPRE TCHETCHE KUIPA USHINDI AZAM FC DHIDI YA SIMBA SC?

LEO ni Simba na Azam kwenye Uwanja wa Taifa, Dar es Salaam zote zikiwania ubingwa wa Ligi Kuu unaoshikiliwa na Yanga. 

Azam inashika nafasi ya pili kwenye msimamo wa ligi hiyo baada ya kufikisha pointi 58 pointi saba nyuma ya vinara wa ligi Yanga yenye pointi 65 na ikiiacha Simba inayocheza nayo leo kwa tofauti ya pointi moja.

Msimamo na hali halisi ya mbio za ubingwa unaashiria mchezo huo utakuwa na ushindani wa hali ya juu, kwani kupoteza kwa timu moja ni sawa na kujiondoa kwenye mbio za ubingwa msimu huu na pengine kutoa nafasi kwa Yanga kutetea tena taji lake.

Timu hizo zinakutana zikiwa na historia tofauti ya mechi zao zilizopita kwa Azam kuibuka na ushindi wa mabao 2-0 dhidi ya Majimaji ya Songea na Simba kufungwa bao 1-0 na Toto Africans ya Mwanza kwenye Uwanja wa Taifa, Dar es Salaam.

Kila timu itahitaji kushinda mechi ya leo kuweka hai matumaini yake ya kutwaa ubingwa; Azam ikitaka kuendeleza wimbi la ushindi na zaidi Simba ikiwania kusahihisha makosa yake kwa kuibuka na ushindi. Kwenye mchezo uliopita timu hizo zilitoshana nguvu kwa kutoka sare ya mabao 2-2.

Azam wameonesha kuwa washindani wazuri kwa timu kubwa za Yanga na Simba na hivyo mchezo wa leo unabeba taswira ya moja ya mechi kubwa kwenye soka la Tanzania. Habari njema kwa Azam leo ni kurejea uwanjani kwa mshambuliaji mahiri wa timu hiyo, Kipre Tchetche, ambaye atashirikiana vyema na John Bocco.

Tchetche alikuwa akisumbuliwa na maumivu ya kifundo cha mguu aliyopata kwenye mchezo wa ligi dhidi ya Mtibwa Sugar uliofanyika Uwanja wa Manungu, Morogoro ambao Azam FC ilishinda bao 1-0. Simba yenyewe katika ushambuliaji itategemea umahiri wa mfumania nyavu wake Hamis Kiiza’Diego’ na mshambuliaji anayekuja vizuri Ibrahim Ajib.

DOWNLOAD APP YETU YA SWAHIBA NEWS ILI UWEZE KUPATA HABARI ZOTE MOJA KWA MOJA KUPITIA SIMU YAKO YA MKONONI BILA KUINGIA KWENYE WEBSITE,KUDOWNLOAD BONYEZA HAPA