YANGA NA AZAM FC HASIRA ZOTE KUMALIZIA FA LEO?..!!

BAADA ya kutoka kwenye michuano ya kimataifa, Yanga na Azam leo zinageukia Kombe la Shirikisho la TFF (FA) zikiwania kucheza fainali,Yanga itakuwa kwenye uwanja wa Mkwakwani Tanga kumenyana na Coastal Union katika mechi ya nusu fainali ya michuano hiyo ya FA.Mechi hiyo inatarajiwa kuwa ngumu kwa pande zote hasa kutokana na matokeo ya karibuni ya timu zote mbili.

Coastal iliyo mkiani mwa msimamo wa Ligi Kuu inaonekana kuzinduka baada ya kuiondoa Simba kwenye robo fainali za michuano hiyo, lakini pia ikishinda mechi zake zilizosalia za Ligi Kuu.

Yanga iko vizuri baada ya ku toka Misri kucheza na Ahly na kuonesha kiwango cha juu, hakuna shaka kwamba leo inapewa nafasi kubwa ya kuibuka na ushindi, licha ya kwamba Yanga ilipoteza mechi ya Ligi Kuu dhidi ya Coastal kwenye uwanja huo.

Kocha wa Yanga, Hans van der Pluijm amesema Coastal Union isitarajie ushindi katika mchezo wa leo kwani hata yeye timu yake inalitaka kombe hilo..

“Coastal wasitarajie kuifunga tena Yanga kama ilivyokuwa kwenye mechi ya ligi tunakwenda tukiwa na mfumo mpya ambao tumeanza kuutumia kwenye mechi mbili zilizopita dhidi ya Mtibwa Sugar na Al Ahly, nadhani huu utakuwa muafaka kwao kuhakikisha tunashinda na kutinga fainali,” alisema Pluijm.

Kwa upande wa Azam, itakuwa Mwadui kumenyana na Mwadui ya Shinyanga mechi ambayo kocha wa timu hiyo Stewart Hall amesema ni muhimu kwao kushinda.

“Mazingira yanatulazimisha kushinda mechi ya kesho (leo), tumetolewa kwenye mashindano ya Afrika, tunashika nafasi ya tatu kwenye mbio za ubingwa hivyo ili matumaini ya kushiriki kimataifa mwakani yawe makubwa ni lazima tuifunge Mwadui,” alisema.

Akiizungumzia mechi hiyo kocha wa Mwadui, Jamhuri Kihwelu ‘Julio’ alisema amejipanga kuitoa Azam na kwamba timu yake ndio bingwa wa michuano hiyo,Mwadui ilitinga nusu fainali ya kombe hilo baada ya kuifunga Geita mabao 3-0 katika mchezo uliochezwa Shinyanga.

DOWNLOAD APP YETU YA SWAHIBA NEWS ILI UWEZE KUPATA HABARI ZOTE MOJA KWA MOJA KUPITIA SIMU YAKO YA MKONONI BILA KUINGIA KWENYE WEBSITE,KUDOWNLOAD BONYEZA HAPA